Pokistonning Laxor shahrida to‘qqiz oylik bolani sudga chaqirishdi. U qasddan odam o‘ldirishga urinishda ayblanmoqda . Bu haqda “Gazeta.ru” xabar bergan.
Gap shundaki, politsiya va gaz ta’minoti korxonasi xodimlari yoqilgan gaz uchun pul to‘lanmaslik holatlarini aniqlash va qarzlarni undirish uchun reyd uyushtirishgan. Shunda boshqa oila a’zolari qatori to‘qqiz oylik Musoxon ham ularga tosh otib, yaralaganlikda ayblanmoqda.
Foto: mk.ru
3-aprel – payshanba kuni sudda bu ish bo‘yicha ilk eshituv bo‘lganida, sudya ayblanuvchining go‘dak ekanligini ko‘rib, hayron qolgan. U bolani ayblab bildirgi yozgan politsiya xodimini ishdan chetlatish haqida farmoyish berib, Musoxonni garov evaziga qo‘yib yuborgan. Ammo bir haftadan keyin u yana asosiy sud yig‘ilishiga kelishi talab etiladi.
Musoxonning qarindoshlari va advokat politsiya xodimini malakasizlikda ayblashmoqda, uning ayblovi mamlakat qonunchiligiga ham to‘g‘ri kelmaydi. Chunki Pokistonda 12 yoshgacha bo‘lgan shaxslar jinoiy javobgarlikka tortilishi mumkin emas.
“U o‘zi sut shishasini ko‘tara olmaydi-yu, qanday qilib politsiyachiga tosh otishi mumkin?” – deydi Musoxonning buvasi.