Amerikalik harbiylar hamda Okean va atmosferani o‘rganish bo‘yicha AQSh milliy boshqarmasi (NOAA) xodimlari XX asrning dengiz tarixi bilan bog‘liq sirni ochishga muvaffaq bo‘ldi, deb yozadi “TASS”. Ular 95 yil avval izsiz yo‘qolgan “Konestoga” (USS Conestoga) harbiy shatakchi kemasini topdi.
Aslida ushbu kema qoldiqlari 2009-yildayoq San-Fransisko qirg‘oqlari yaqinida Farallon orollaridan 5 km masofada 57 metr chuqurlikdan topilgan, biroq o‘shanda tadqiqotchilar cho‘kib ketgan noma’lum kemani aniqladik, deb o‘ylagan edi.
2014-yilda mutaxassislar avvalroq topilgan cho‘kib ketgan kemalarni o‘rganishni boshladi. 2015-yil oktabrida ular “Konestoga”ning yo‘nalishi Farallon orollari yaqinidan o‘tganini aniqladi. Kema halokatga uchragan hudud chuqur suv ostiga kameralar tushirib o‘rganildi. Olingan kadrlarda kemaga jiddiy shikast yetmagani, ammo uning korpusi korroziyadan ancha zararlanganini ko‘rish mumkin.
Tadqiqot yakunlariga ko‘ra, okeanshunoslar va ularga yordam bergan harbiylar cho‘kib ketgan kema “Konestoga” degan xulosaga keldi.
Ushbu shatakchi kema AQSh harbiy-dengiz kuchlari tomonidan 1917-yilda sotib olingan. U 1921-yilda Mar-Aylenddagi harbiy-dengiz bazasidan Gavayidagi Pyorl-Xarborga otlangan, o‘shandan buyon “Konestoga” va uning 56 nafar ekipajining taqdiri noma’lum bo‘lib kelgan.
Manba
