AQShning Kolarodo shtatidagi novvoyxonalardan biriga ayiq hujum qilib, 38ta pirogni eb qo'ygan. Bu haqda Sky News nashri xabar berdi.
Colorado Cherry Company nomli novvoyxonalarni birlashtirgan kompaniya xo'jayini Kristi Lenertning ma'lum qilishicha, ayiq yana 2ta pirogni o'zi bilan olib ketgan.
Qayd etilishicha, ayiq Layons shahridagi ushbu novvoyxonaga "tajribali o'g'rilar" kabi harakatlanib, kameralarni chetlab o'tgan holda kirib olgan. Lekin ichkarida u izlarini yashirishga urinmagan va barcha narsani ag'dar-to'ntar qilib, derazalarni sindirgan.
Lenertning aytishicha, voqealar rivoji bundan ham yomon rivojlanishi mumkin edi.
"Binoning yuqori qismida restoran ham joylashgan. Ayiq esa u yoqqa chiqmasdan, burchakdagi shirinliklar tomon burilgan. U 24ta gilosli va 14ta olmali pirogni paqqos tushirgan, qulupnayli va ravochli piroglarga esa teginmagan", deydi u.
Qayd etish joizki, Lenert ayiqlardan ilk marta jabrlanmayapti. Biroz oldinroq, uning Lavlend shahridagi nonvoyxonasiga ham ayiq hujumi kuzatilgandi.
