Toshkentda eng yaxshi intellektual mulk obyekti — “Yangi intellekt” an’anaviy tanlovining joriy yilgi g‘oliblarini taqdirlash marosimi bo‘lib o‘tdi, deya xabar bermoqda “UZ24”.
Tanlovda “Eng yaxshi ixtiro”, “Eng yaxshi foydali model”, “Eng yaxshi sanoat namunasi” va “Eng yaxshi dasturiy mahsulot” yo‘nalishlarida uchtadan g‘olib aniqlandi.
Xususan, Abu Rayhon Beruniy nomidagi Toshkent davlat texnika universiteti olimlari tomonidan yaratilgan “Tokni kuchlanishga o‘zgartirgich” nomli ishlanma joriy yildagi eng yaxshi ixtiro deb topildi. Toshkent to‘qimachilik va yengil sanoat instituti tadqiqotchilari ishlab chiqargan “Zanjirli uzatma” nomli loyiha eng yaxshi foydali model, “Sovplastital” korxonasining “Barg” bezak likopchasi idishlar to‘plami eng yaxshi sanoat namunasi deb e’tirof etildi.
“Eng yaxshi dasturiy mahsulot” yo‘nalishida Toshkent axborot texnologiyalari universiteti mutaxassislari tomonidan yaratilgan “Kardiologik signallarni kiritish, qayd qilish va ishlov berish” tizimi birinchi o‘ringa munosib ko‘rildi.
