“Barselona” jamoasi hujumchisi Neymar klub rahbariyati bilan shartnomasini uzaytirish borasida kelishuvga erishdi, deb COPE nashriga tayangan holda “TASS” agentligi xabar bermoqda.
Manbaning ma’lum qilishicha, tomonlar shartnomani 2021-yilga qadar uzaytirishga kelishib oldi. Bo‘lajak shartnomaga ko‘ra, braziliyalik futbolchining maoshi oshiriladi. Biroq, u qancha maosh olishi haqida ma’lumotlar hozircha yo‘q.
Avvalroq 24 yoshli hujumchiga “Real” hamda “Manchester Yunayted” klublari qiziqish bildirgan. Ispan nashrlari “Qirollik klubi” prezidenti Florentino Peres “Barselona”ga Neymar uchun 190 million yevro taklif qilgani va ular deyarli kelishuvga erishgani haqida xabar qilgandi.
Joriy mavsumda Neymar “Barselona” safida 32 o‘yinda maydonga tushib, raqiblar darvozasiga 23 ta gol kiritgan. Ta’kidlash joiz, uning kataloniyaliklar bilan amaldagi shartnomasi 2018-yilning yoziga qadar davom etadi.
Manba
