Las-Vegasda o'tayotgan CES-2016 ko'rgazmasi chog'ida dronlari bilan mashhur Parrot kompaniyasi Pot nomli “aqlli gultuvak” taqdimotini o'tkazdi.
Parrot Pot’ning vazifasi xonaki gullarni parvarishlashdir. Buning uchun gadjetga kislota, harorat, yorug'lik va namlik datchiklari o'rnatilgan bo'lib, shu orqali u gullarning ahvolini kuzatib turadi. Bundan tashqari, maxsus purkagichlar orqali u gullarga 2.2 l gacha suv sepa oladi.
Dasturiy ta'minotga 8 ming turdagi xonaki gullar haqida axborot yuklangan, shu bois u qanday gulni qanday parvarish qilishni biladi, shuningdek, bu borada xo'jayinga maslahat berib turadi.
Gultuvak prototipi o'tgan yilgi CES’da namoyish etilgan edi. Bu safar esa seriyali variant ko'rsatildi – uni shu yilning aprel oyidan boshlab AQShda 100 dollarga sotib olish mumkin.
