Tunnelda burg`ulash, kovlash ishlari muddatidan oldin tugatildi, deya xabar beradi “O`zbekiston temir yo`llari” AJ axborot xizmati.
O`zbekiston Respublikasi Prezidentining qaroriga asosan Angrendan Popgacha qurilayotgan elektrlashtirilgan temiryo`l liniyasining 19 kilometrlik asosiy tunnelning ikkala tomonidan burg`ulash, kovlash ishlari tugatilib, tutashtirildi.
Mazkur ulkan loyiha “O`zbekiston temir yo`llari” aksiyadorlik jamiyatining tajribali va malakali temiryo`lchilari tomonidan Xitoyning “China Railway Tunnel Group” kompaniyasi bilan hamkorlikda amalga oshirilmoqda.
Bu tunnel qurilishi murakkabligi bo`yicha jahonda birinchi sakkiztalikdan, uzunligi bo`yicha 13 talikdan joy olgan, MDH mamlakatlaridagi yagona noyob qurilish inshooti hisoblanadi.
Ayni kunda esa pardozlash ishlari davom etayapti. Bugungi kungacha tunnelning 85 foizida pardozlash ishlari bajarildi. Ha demay tajribali temiryo`lchilarimiz tunnelda po`lat izlar yotqizish va elektrlashtirish, kommunikasiya ishlarini ham boshlab yuboradilar.
Shuni alohida ta`kidlash kerakki, uzunligi 123,1 kilometrdan iborat bo`lgan mazkur loyihaning tunneldan tashqari 104 kilometrida barcha qurilish ishlari 2015 yil avgust oyining so`nggi kunlarida to`liq tugatilgan edi.
Manba: "Darakchi" nashri