Qirg‘izistonda hokimiyatni zo‘ravonlik bilan egallab olishga urinishda ayblanib, muxolifatchi Ernest Karibekov hibsga olindi. Bu haqda mamlakat milliy xavfsizlik qo‘mitasi ma’lum qildi, deya xabar beradi “TASS”.
Qo‘mita ma’lumotlariga ko‘ra, gumonlanuvchi “Hokimiyatni zo‘rlik bilan qo‘lga olish yoki zo‘rlik bilan ushlab turish” moddasi bo‘yicha qo‘zg‘atilgan jinoiy ish doirasida qo‘lga olingan. Shuningdek, mazkur ish bo‘yicha Davlatbek Turdunaliyev ham gumon qilinmoqda, biroq ayni paytda qayerda ekanligi noma’lum bo‘lgani bois, unga nisbatan qidiruv e’lon qilingan.
26-mart, shanba kuni qo‘mita Jalolobod viloyatining sobiq gubernatori Bektur Asanov va “Chindik” partiyasi yetakchisi Kubanichbek Qodirovga ham shunday ayblov qo‘ygan va ular sud qaroriga binoan qamoqqa olingan.
Bir necha kun avval internetda Qirg‘izistonda hokimiyatni qo‘lga olish rejasini muhokama qilayotgan qirg‘iz siyosatchilari audioyozuvi e’lon qilingandi. 23-mart, chorshanba kuni qo‘mita ularning haqiqiy ekanligini tasdiqladi.
Manba
