Nepalda Tara Air aviakompaniyasiga tegishli samolyot halokatga uchragan joyda barcha 23 nafar qurbonning jasadi topildi. Bu haqda Indian Express nashri ma’lumotiga tayanib, “RIA Novosti” xabar beradi.
Aviahalokat qurbonlari orasida ikki nafar chet ellik – Xitoy va Kuvayt fuqarolari ham bo‘lgan.
Nashrning ma’lum qilishicha, jasadlarning yettitasi shaxsini aniqlash uchun Pokxara shahridagi shifoxonaga yetkazilgan. Qolgan qurbonlarning jasadi ham o‘sha shifoxonaga yetkaziladi.
Mamlakat hukumati halokat sabablarini aniqlash uchun maxsus komissiya tashkil etish to‘g‘risida buyruq berdi. Halokatga ob-havo sharoitlarining sabab bo‘lganligi dastlabki taxminlardan biri hisoblanmoqda. Komissiya 90 kundan keyin tekshiruv natijalari bo‘yicha hisobotni taqdim etishi lozim.
Eslatib o‘tamiz, avvalroq halokat hududidan 20 kishining jasadi topilganligi haqida ma’lum qilingan edi.
Manba
