27-fevral, shanba kuni kechki payt Rossiyaning Vorkuta shahridagi “Shimoliy” (“Severnaya”) konida yuz bergan navbatdagi portlashdan so‘ng u yerda qamalda qolgan 26 konchining tirik ekanligidan umid yo‘q.
Bu haqda Rossiya favqulodda vaziyatlar vaziri Vladimir Puchkov ma’lum qildi. Kon egasi bo‘lgan “Vorkutaugol” kompaniyasi vakillari ham buni tasdiqlagan, deya xabar beradi “RBK”. Puchkovning bildirishicha, navbatdagi portlash epimarkazi yerostining konchilar bo‘lgan qismiga to‘g‘ri kelgan. “Konning falokat ro‘y bergan hududidagi holat kimdir omon qolishiga imkon bermasligini qayd etishga majburmiz. Ketma-ket portlashlar tufayli u yerda yuqori harorat mavjud, kislorod esa yo‘q”, — deya ta’kidlagan FVV rahbari.
Eslatib o‘tamiz, 25-fevral kuni “Shimoliy” konida metan portlashi tufayli 4 kishi halok bo‘lgan, 26 kishi qamalda qolgandi. Portlash chog‘ida konda 111 kishi bo‘lgan, ulardan 81 kishi yuqoriga olib chiqilgan.
28-fevralga o‘tar kechasi konda qidiruv-qutqaruv ishlari vaqtida yana bir portlash sodir bo‘ldi. Natijada besh nafar qutqaruvchi va bir nafar konchi halok bo'ldi.
Manba
