Xitoyda bankni o‘marmoqchi bo‘lgan omadsiz bosqinchi farosatsizligi bois o‘z niyatiga yeta olmadi. U himoya oynasi ortida o‘tirgan kassir ayolga oshxona pichog‘i bilan tahdid qilmoqchi bo‘ldi, ammo o‘zi kulgiga qoldi. Bu to‘g‘rida "Sinxua” axborot agentligi xabar bermoqda.
"Ish”ini eplay olmagan bosqinchining xatti-harakatlari kuzatuv kameralari orqali yozib olingan. Videolavhadan ma’lum bo‘lishicha, ko‘k kurtkali erkak kelib, ayolga tahdid qilish niyatida qo‘lidagi pichoqni o‘qtalgan, ammo pichog‘i himoya oynasiga urilgan. Tag‘in bu paytda u ikkinchi qo‘lidagi telefon orqali gaplashayotgan bo‘lgan.
Foto: xinhuanet.com
Himoya oynasining ikkinchi tomonida bo‘lgan kassir ayol o‘zini yo‘qotib qo‘ymagan, balki bosqinchining besamar harakatlaridan zavqlanib kulgan. Ko‘rinib turibdiki, bosqinchi mazkur jinoyatga tayyorlanmasdan qo‘l urgan. U jinoyat quroli bo‘lgan pichoqni baribir ishlata olmadi, chunki bankda o‘rnatilgan mustahkam himoya oynasi xodimlarni shu kabi tajovuzlardan ishonchli muhofaza qiladi.
Bosqinchi bir necha daqiqa ichida qo‘lga olingan va voqea yuzasidan tergov ishlari boshlangan. Uning ruhiy kasal ekanligi taxmin qilinmoqda.
