Apple, Google, Intel va Adobe IT-korporatsiyalari ishchilarga 415 million dollar to‘lash to‘g‘risida kelishib oldi, deb yozadi “TASS”. Ushbu mablag‘ kompaniyalar bir-birining xodimlarini og‘dirib olmaslik bo‘yicha tuzgan kelishuv bilan bog‘liq sud ishini hal qilish uchun to‘lanadi.
Shikoyat arizasi 2011-yilda ushbu to‘rtta kompaniyaning 64 ming nafar xodimi tomonidan berilgan. Ular kompaniyalar bir-birining ishchilarini og‘dirib olmaslikka kelishgani uchun 3 milliard dollar miqdorida tovon puli talab qilgan. Shikoyatchilar fikricha, shu tariqa kompaniyalar ishchilarga boshqa kompaniyalardan yanada manfaatliroq takliflar olishi uchun to‘siq yaratgan.
