Pulning nimaligini va qanday maqsadlarda ishlatilishini hamma biladi. Ammo uni etarli miqdorda qaerdan olish mumkin, degan savolga uncha-muncha odam javob bera olmaydi. Million cho'ntakda yoki qanday qilib pul ishlab topish mumkin? Bu hazil yoki balandparvoz gaplar emas. Faqat bitta farqi bor: millionga bugun emas, balki kelajakda erishish nazarda tutilmoqda. Aslida ISTALGAN pulni millionga aylantirish mumkin. Hammasi hozir qancha pulingiz borligiga bog'liq. Bu millioner bo'lishda muhim omil hisoblanadi. Keling, qanday qilib pulni o'zimizga jalb qilish mumkinligi haqida bosh qotirib ko'raylik. Qanday qilib ozgina pulni millionga aylantirsa bo'ladi? Millionga ega bo'lishda pulga afsun o'qib berish ham yordam bermasligi mumkin. Ma'lumki, hozirgi kunda pul pulni «chaqiradi». Faqat bu imkoniyatdan to'g'ri foydalansangiz bo'lgani. Eng yorqin misol, bank depozitini olaylik. Bankka, shartnomaga asosan, omonatga pul qo'yish mumkin. Shartnomada ko'rsatilgan muddat o'tgach esa, bank sizga o'z pulingizni qaytarib beradi. Yana undan foydalangani uchun foizini ham to'laydi. Oddiy matematik hisob-kitobni keltirsak. Deylik, siz 1 so'mni 14 foizlik omonatga qo'ydingiz. Arzimas pul, albatta. Ammo vaqt uchun bitmaydigan ishning o'zi yo'q. Oradan bir yil o'tgach, bank sizga o'sha 1 so'mingiz va unga qo'shib 14 tiyin foizingizni ham qaytaradi. Agar hosil bo'lgan 1,14 so'mni yana kelgusi yilga qo'ysangiz, bir yildan so'ng siz 1,30 so'm pul olishingiz mumkin. Bu safar foyda miqdori 16 tiyinni tashkil qildi. Agar mazkur jarayonni yilma-yil takrorlab borsangiz, roppa-rosa 106 yildan keyin siz 1.076.025,67 so'm egasiga aylanasiz. Eslang, boshida bor-yo'g'i 1 so'm pul qo'ygandingiz. Endi hamyoningizda qancha pul bor? Agar bir necha mingni qo'ygan bo'lsangiz, 106 yildan so'ng pulingiz 2,15 milliardni tashkil qiladi. To'g'riku-ya, lekin 20, 30 yoki 50 yoshda bo'lsangiz, sizda millionga ega bo'lish uchun 106 yil qayoqda, deysiz! Tushkunlikka tushmang. Keltirilgan misol oddiy matematik hisob emas, balki qanday qilib, millioner bo'lish masalasini hal qilishga qat'iy kirishish degani. Hatto, siz ishlatmay qo'ygan 1 so'm pul ham vaqti kelib sizni millionerga aylantirishi mumkin. Bu boylikni yaratish tizimidagi asosiy «g'isht» hisoblanadi. Keling, ana shu g'ishtlardan ayrim kompozitsiyalarni hosil qilishga urinib ko'raylik. Agar 1 so'm 106 yilda millionga aylansa, 2 so'm qo'yilganida vaqt 102 yilni tashkil qiladi. Bordi-yu, 10 so'mdan boshlagan bo'lsangiz, millionni 89 yil kutishga to'g'ri keladi. Mabodo, 100 so'm qo'yilsa, 72 yildan so'ng siz millionerga aylanishingiz mumkin. Chakki emas, to'g'rimi? Endi jarayonni tezlashtirib ko'ramiz. Agar 1 so'mingiz daromad keltirishini bir yil kutib o'tirishni xohlamasangiz, unda HAR KUNI omonatga 1 so'mdan qo'yib borish mumkin. Shunday yo'l bilan millionga 46 yildan so'ng erishsa bo'ladi. Agar 2 so'mdan qo'ya boshlasangiz, roppa-rosa 41 yildan so'ng maqsadga erishasiz. 10 so'm qo'ysangiz, bu 29 yilda amalga oshadi. Bordi-yu, HAR KUNI 100 so'mdan qo'ya boshlasangiz millionlarga 13 yilda erishasiz.
Manba: Biznestrener.uz
