O‘zbekistonda xalqaro axborot tarmoqlaridan foydalanish umumiy tezligi mart oyi oxiriga kelib 2015-yil boshiga nisbatan 17 foizga o‘sdi va 19,25 Gbit/s ni tashkil qildi, deya xabar bermoqda “Gazeta.uz”.
Bu haqda O‘zbekiston Axborot texnologiyalari va kommunikatsiyalarini rivojlantirish vazirligining 2015-yil birinchi chorak yakunlari bo‘yicha 1-may kuni bo‘lib o‘tgan Hay’at majlisida ma’lum qilingan.
Ma’lumot uchun, O‘zbekistonda 2014-yil davomida tashqi internet-kanal sig‘imi qariyb 62 foizga – 10,3 Gbit/s dan 16,64 Gbit/s gacha oshgan edi.
Xalqaro paketli kommutatsiya markazi orqali mamlakatning barcha provayderlariga internet xizmatini taqdim etuvchi “O‘zbektelekom” kompaniyasi 2014-yil boshida, talabdan kelib chiqib, tashqi internet kanallari tezligini to‘rt barobar oshirishi mumkinligini ma’lum qilgandi.
