Ispaniya kubogining “Barselona” va “Sevilya” o‘rtasidagi final uchrashuvi Madridning “Real” klubi uy arenasi bo‘lgan “Santyago Bernabeu” stadionida o‘tkazilmaydi, deya xabar bermoqda “Chempionat”.
Marca nashri manbasiga ko‘ra, o‘sha kuni arenada amerikalik rok va folk musiqachi Bryus Springstinning konserti bo‘lib o‘tishi rasman e’lon qilingan.
Agar “Sevilya” Yevropa Ligasi final o‘yini ishtirokchisiga aylanmasa, uning “Barselona” bilan bahsi 21-mayga belgilangan, aks holda, uchrashuv 22-mayga ko‘chiriladi. Biroq bu sanada ham “Santyago Bernabeu” o‘yin uchun ochiq bo‘lmaydi.
Avvalroq Barselona “Santyago Bernabeu”da o‘ynashni istayotgani haqida bir necha marta xabar berildi, biroq deyarli hech kim “Real” o‘z o‘yini uchun ushbu stadionni taqdim etmasligiga shubha qilmadi. Zero “Qirollik klubi” va uning muxlislari “Barselona” ularni yana bir marta o‘z stadionida mag‘lubiyatga uchratishini ko‘tara olmasligi mumkin.
