Caviar Rossiya-Italiya zargarlik brendi yangi “Prezident iPhone’i”ni tayyorlaganini ma’lum qildi. Bu haqda Hi-tech.mail.ru xabar bermoqda.
Caviar 2014-yilning iyunida Rossiya prezidenti Vladimir Putinning surati tushirilgan qimmatbaho iPhone Supremo Putin smartfonini taqdim etgandi, ushbu o‘ziga xos qurilma internetda “Putinfon” nomini olgandi.
Biroq Rossiya prezidenti matbuot kotibi Dmitriy Peskov, Putin o‘z timsolining tijoriylashtirilishini ma’qullamasligini bildirganidan so‘ng, Caviar bunday smartfonlarni tayyorlashni to‘xtatgandi.
“Biroq xaridorlardan “Putinfon”ni qayta tiklash haqidagi talablar tushaverganidan so‘ng, Caviar kompaniyasi Caviar President smartfonini tayyorlashga qaror qildi. U aynan bir shaxsga emas, balki Rossiyaning yetakchiligini ko‘rsatishga bag‘ishlangan”, – deyiladi xabarda.
Telefonning tilla pannosiga Rossiya xaritasi chizmasi, Rossiya gerbi va Rossiya prezidentining shohona qarorgohi – Katta Kreml saroyi surati tushirilgan. Ekslyuziv qurilma 169 ming rublga baholanmoqda.
