AQSh patent va savdo belgilarini ro'yxatdan o'tkazish byurosi Chevrolet kompaniyasiga o'zining yangi modelini Bolt nomini bilan qayd qilishni taqiqlab qo'ydi , chunki 2012 yilda bunday nom bilan Yamaha mototsikllari ro'yxatdan o'tgan.
AQSh markasi ushbu nomni olish uchun o'tgan yilning avgust oyida ariza topshirgan edi. Bolt nomi bilan kompaniyaning hamyonbop elektrokarini atash mo'ljallanayotgandi. Bolt EV nomli prototip joriy yilning yanvarida Detroyt avtosalonida namoyish qilingan.
Kontsept narxi 30 ming dollardan oshmaydigan to'liq elektr dvigatelli kundalik hamyonbop elektrokar qanday bo'lishini namoyon qiladi. Bolt kontsept-karining kuch qurilmasi haqida ma'lumot berilmagan.
Shunisi ma'lumki, avtomobil to'lik quvvatlangan batareyalarda 200 mildan ko'proq (322 km) yo'l bosishi mumkin. Akkumulyatorlar zaxirasi tez quvvatlanuvchi maxsus stantsiyalardan to'ldiriladi. Bolt EV ning seriyali versiyasi endi boshqa nom bilan 2016 yilning oktyabrida sotuvga chiqarilishi mo'ljallangan.
