Tayvan (Xitoy) suvlarida bundan 5 yil avval yo‘qotilgan fotoapparat topildi. Kamera egasi Lindsi Skallan fotoapparat suv tubida 5 yil yotganiga qaramay, bus-butun ekanini ko‘rib, hayratdan yoqa ushladi.
— Bunday bo‘lishini sira kutmagandim. Oradan shuncha vaqt o‘tganiga qaramay, apparatga hech narsa qilmabdi. Hatto, olgan suratlarim qanday bo‘lsa, o‘shandayligicha turibdi, - deydi Skallan. Ma’lum bo‘lishicha, Lindsi ushbu fotoapparatni Gavay orollarida dam olayotganida yo‘qotib qo‘ygan. O‘shanda uning suvo‘tmas fotoapparati dengizga tushib ketgan. Fotoapparat suza-suza besh yildan keyin Tayvan sohillariga kelib qoladi. Mutaxassislarning aytishicha, fotoapparat chidamli va sifatli materialdan ishlangan. Aks holda fotoapparat egasining qo‘liga eson-omon yetib kelolmasdi.
Manba: Zamondosh.uz
