O‘t ochishni to‘xtatish to‘g‘risidagi kelishuvni imzolagan Suriyaning muxolifatdagi guruhlari yetakchilari Rossiya mudofaa vazirligidan ularni IShID jangarilaridan himoya qilishni so‘radi. Bu haqda Rossiyaning Suriyadagi ixtilof tomonlarini murosaga keltirish markazi boshlig‘i, general-leytenant Sergey Kuralenko ma’lum qildi, deya xabar beradi “RBK”.
“Ular bizdan xavfsizliklarini ta’minlash, sulhni imzolagan muxolifatchilarga qarshi haqiqiy ov boshlagan IShID va boshqa terrorchi tashkilotlardan himoya qilishni so‘ramoqda. Biz jangovar harakatlarni to‘xtatish va yarashuv jarayonini boshlash to‘g‘risida kelishuvni imzolagan muxolifat tuzilmalari yetakchilari hamda mahalliy ma’muriyat rahbarlari xavfsizligini ta’minlashda yordam berishga tayyormiz”, — deya ta’kidlagan Kuralenko.
Rossiya markazi mutasaddilari Suriya muxolifatiga mansub yana sakkiz guruh o‘t ochishni to‘xtatish tartibiga qo‘shilganini bildirdi. Shu tariqa sulhga rozilik bildirgan guruhlarning jami soni 30 taga yetdi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Manba
