IShID boshliqlaridan biri Umar ash-Shishaniy klinik o‘lim holatida bo‘lib turibdi, deya xabar bermoqda “TASS” “Al-Arabiya” telekanaliga tayanib.
Suriya hududidagi nodavlat tashkilot vakili ma’lumotlariga ko‘ra, “bir necha kun avval olgan jarohatlari tufayli ash-Shishaniy klinik o‘lim holatiga tushib qolgan”. Ayni paytda IShID yo‘lboshchilaridan biri “mustaqil nafas ololmay qolgan, unga doimiy ravishda sun’iy nafas apparati zarur bo‘lmoqda”.
Ta’kidlanishicha, jarohatlar olgach, ash-Shishaniy Suriyaning Rakka shahri yaqinidagi kasalxonaga yotqizilgan, u yerda uni “professional chet ellik shifokorlar” davolamoqda.
Eslatib o‘tamiz, avvalroq Pentagon matbuot kotibi Piter Kuk IShID terrorchilik tashkiloti boshliqlaridan biri Abu Umar ash-Shishaniy 4-mart kuni Suriyadagi Shaddadi shahri tashqarisi AQSh tomonidan aviahujumga uchrashi natijasida yo‘q qilinganini ma'lum qilgan edi.
Keyinroq Londondagi Inson huquqlariga rioya qilish bo‘yicha Suriya markazi rahbari ash-Shishaniyning tirik qolgani haqida bayonot bergan edi.
Ash-Shishaniyning haqiqiy ismi Tarxan Taimurazovich Batirashvili, laqabi Umar Chechen bo‘lgan. U millati bo‘yicha gruzin bo‘lib, IShID tuzilmasida ko‘plab yuqori lavozimlarni egallagan, jumladan urush vaziri bo‘lgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Manba
