Mobil telefonlar uchun ishlab chiqilgan yangi ilova ixtilof girdobida qolgan hududlarda istiqomat qiluvchi aholiga harbiy jinoyatlar haqida ma'lumot to'plashga yordam beradi. Bu haqda Reuters agentligi xabar bermoqda.
Xalqaro advokatlik palatasi mutaxassislarining bildirishicha, ijtimoiy tarmoqlar orqali tarqatiladigan video va fotodalillarning haqiqiy ekanligini isbotlab berishning deyarli imkoni yo'q. Yangi EyeWitness to Atrocities ilovasi esa ularni tekshirish va saralab olish imkonini beradi.
Videolavhalar va suratlar huquq-tartibot idoralari nazorati ostidagi ma'lumotlar bazasiga kelib tushganga qadar ilova foydalanuvchining joyi, s'yomka vaqti va sanasi, shuningdek, yaqin-atrofdagi Wi-Fi tarmog'ini tekshirib ko'radi. Shundan so'ng foydalanuvchi ma'lumotlarni anonim tarzda yuborish imkoniyatiga ega bo'ladi. Ma'lumotlar bazasiga kelib tushgan materiallar faqat huquq-tartibot idoralari ekspertlari ixtiyorida bo'ladi.
Ta'kidlanishicha, ilova birinchi galda ixtiloflar girdobida qolgan hududlar, jumladan, Ukraina, Suriya va Iroqdagi foydalanuvchilarga yetkazib beriladi.
