3-mayda O‘zbekiston Ekologik harakatining Toshkent viloyati bo‘limi tomonidan “Ekomaktab” jamoat tashkiloti va Ugam-Chotqol davlat tabiiy milliy parki Boshqarmasi bilan hamkorlikda Xalqaro Yer kuniga bag‘ishlangan “ekologik aksiya” o‘tkazildi. Bu haqda UzReport xabar berdi.
Tadbirda Toshkent viloyati Tabiat muhofazasi bo‘yicha qo‘mitasi va Ugam-Chotqol davlat tabiiy milliy parki vakillari, O‘zbekiston Respublikasi Oliy Majlisi Qonunchilik palatasi deputatlari, Elchi Jorj Krol rahbarligidagi AQSh Elchixonasi hamda General Motors Powertain Uzbekistan xodimlari va OAV vakillari ishtirok etdi. Tadbirni tashkil etishga O‘zbekiston alpinistlari klubi va “Yashil dunyo” bolalar sayyohlik klubi tomonidan ko‘mak berildi.
Tadbirda ma’lum tabiiy hudud uchun mos bo‘lgan daraxtlarni sun’iy tarzda ekish orqali tabiiy ekotizm va tog‘ landshaftlarini qo‘llash amaliyoti joriy qilindi. Shu qatorda, o‘rmon-park hududiga asos solish marosimi ham o‘tkazilib, jamoatchilik tomonidan tog‘ gruntiga 200 ga yaqin tog‘da o‘sish xususiyatiga moslashtirilgan daraxt ko‘chatlari ekildi.
Shuningdek, xohlovchilar “Daraxtni boqib ol” aksiyasida qatnashib, istalgan bir daraxtni o‘z qaramog‘iga olish, o‘z nomi bilan daraxt ekish yoki shunchaki qurg‘oqchilik vaqtida sug‘orish uchun kelish imkoniyatiga ham ega bo‘ldi. Ko‘chatlarni ekish bo‘yicha “ekologik aksiya” 10-mayga qadar davom etadi.
Tashkilotchilar mazkur hududda ko‘chat ekish ishlarini kuzda davom ettirishni rejalashtirmoqda.
