2013-yil 31-dekabr kuni WhatsApp lahzali xabar almashish tizimi orqali 18 milliard xabar yuborildi. Bu haqda WhatsApp’ning rasmiy tvitteri ma’lum qildi.
Tvitda keltirilishicha, 31-dekabr kuni 7 milliard kiruvchi, 11 milliard chiquvchi xabar yuborilgan. Kompaniyaning ma’lum qilishicha, kiruvchi va chiquvchi xabarlar tafovutiga guruhlarda bitta chiquvchi xabar ko‘p kishiga yuborish imkoniyati sabab bo‘lgan.
UzDaily nashri ma’lum qilishicha, "Bilayn” operatori tizimida 31-dekabr va 1-yanvar kunlari 40 million SMS yetkazilgan, 450 million qo‘ng‘iroq amalga oshirilgan.
Eslatib o‘tamiz, 2013-yil davomida WhatsApp o‘zbek estradasi yulduzlari sirlarini bir necha bor fosh etdi.
Oktabr oyida "Bilayn” tijorat direktori Dmitriy Grigoryev WhatsApp’ni ko‘p trafik sarflashda aybladi. Bu ayblovni WhatsApp bosh direktori Yan Kum darhol rad etdi.
16-oktabr, 3-noyabr va 8-dekabr kunlari WhatsApp butun dunyo bo‘ylab ishlamay qoldi. Dastur faoliyati bir necha soatlardan so‘ng tiklandi.
Noyabrning boshlarida WhatsApp texnik muammolarga duch kelgani sababli dasturning o‘zbekistonlik foydalanuvchilari ommaviy tarzda Telegram dasturiga o‘tishni boshladi. Bu "migratsiya”ni Telegram rasmiy tvitteri tasdiqladi. Buning oqibatida Telegram Google Play do‘konida eng ko‘p ko‘chirilgan dasturlar reytingida WhatsApp’dan o‘zib ketdi. Ucell esa, o‘z navbatida, WhatsApp yaxshi ishlamasligiga sababchi emasligini ta’kidladi.
25-oktabr kuni dastur orqali "Bilayn” aloqa operatori yopilishi haqida asossiz mish-mishlar tarqaldi. Kompaniya yopilishidan xavfsiragan abonentlar tufayli Ucell ofislarida uzun navbatlar yuzaga keldi. "Bilayn” bosh direktori so‘zlariga ko‘ra, mish-mishlar kompaniyaga yarim million dollar zarar keltirdi. Ushbu hodisa Uznetda sodir bo‘lgan yilning eng muhim hodisalaridan biri deb tan olindi.
Dekabrning so‘nggi dekadasida WhatsApp foydalanuvchilari soni 400 millionga yetgani haqida xabar berildi.
