AQShning Apple korporatsiyasi Federal qidiruv byurosi xodimlariga Kaliforniya shtatidagi San-Bernardino shahrida ommaviy qotillik uyushtirgan jinoyatchilardan birining telefonini buzib, undagi ma’lumotlarni olishda yordam berishi lozim. Bunday qarorni seshanba, 16-fevral kuni sudya Sheri Pim e’lon qildi, deb xabar beradi “TASS” agentligi.
Sud qaroriga muvofiq, korporatsiya shu paytga qadar terrorchilardan biri Said Faruqning mobil uskunasi ma’lumotlariga buzib kira olmayotgan FQB xodimlariga maxsus dasturiy ta’minot taqdim etishi talab qilinadi.
Muqaddam uskunaning himoyasini buza olmayotgani haqida bayonot bergan FBQ telefonning rusumini oshkor etmagandi. Sud qaroridan so‘ng gap Apple mahsuloti haqida ketayotgani ma’lum bo‘ldi, deb hisoblamoqda jurnalistlar.
Eslatib o‘tamiz, 2015-yilning 2-dekabr kuni AQSh fuqarosi Said Faruq turmush o‘rtog‘i Teshfin Malik bilan San-Bernardinodagi nogironlarga yordam ko‘rsatish markaziga uyushtirgan hujumi oqibatida 14 kishi halok bo‘lgan, 21 kishi jarohat olgan edi. Politsiya tomonidan yo‘q qilingan terrorchilar IShIDga daxldorligi aytilgan edi.
Manba
