Namangan shahrida «Odnoklassniki» muzqaymoqlari sotilmoqda. Bu haqda Twitter foydalanuvchilari ma'lum qilishdi.
Qayd etishlaricha, muzqaymoq 1000 so'mdan sotilmoqda, «ta'miga gap yo'q». O'ram ichidagi muzqaymoqning o'zi ham «Odnoklassniki» ijtimoiy tarmog'i logotipi shaklida tayyorlangan.
Ayni vaqtda, boshqa foydalanuvchilarning ma'lum qilishlaricha, bunday muzqaymoqlar «Farg'onada bir oydan beri sotilmoqda».
Twitter foydalanuvchilarining qayd etishlaricha, ushbu muzqaymoqlar Namangan shahrida faoliyat olib boruvchi OFBM kompaniyasi tomonidan ishlab chiqarilmoqda.
Ishlab chiqaruvchilar Rossiyadagi ommabop ijtimoiy tarmoq tanish belgilari va nomidan foydalanish huquqiga egami-yo'qmi, noma'lum.
Avvalroq, Toshkent shahrida iPhone 5 nomli muzqaymoqlar sotilayotgani, o'ramdagi muzqaymoq esa Apple kompaniyasi logotipini yodga solishi haqida xabar berilgan edi.
O'shanda ushbu muzqaymoqni ishlab chiqaruvchi korxona xodimi buning uchun tegishli ruxsat va patent olingani, Apple’ga «pul to'lab turilishini» ma'lum qilgandi.
