Paragvayning “Olimpiya” klubi o‘yinchilari mamlakat chempionati doirasidagi “Deportivo Santani” bilan o‘yin oldidan kiyinish xonasidan qizil tasmalar bilan o‘rab tashlangan to‘rtta qurbaqani topib oldi, deya xabar bermoqda “Korrespondent.net”.
“Olimpiya” delegatsiyasi vakillari, shuningdek, Xuan Xose Vaskes stadioniga yetib kelganida kuchli dori hidini sezganini ta’kidladi.
Paragvay OAVlari yozishicha, mezbon jamoa muxlislari mehmonlarga omadsizlik keltirishi uchun kiyinish xonasining turli burchaklariga qurbaqalarni qo‘ygan. Ulardan biri o‘lik holda bo‘lgan.
Biroq “Deportivo”ga “sehrgarlik” yordam bermadi — uchrashuv 4:0 hisobida “Olimpiya” foydasiga hal bo‘ldi.
