Tojikiston davlat moliya nazorati va korrupsiyaga qarshi kurash agentligi Dushanbedagi Xalqaro maktabning 10-sinf o‘quvchisini qo‘lga oldi, deya xabar bermoqda Asia-Plus.
O‘quvchi Xushdil Qurbonov o‘zini Tojikiston prezidenti Emomali Rahmonning o‘g‘li Somoni Emomali deb ko‘rsatib, odamlardan yirik miqdorda pul olgan va amaldorlarga noqonuniy buyruqlar bergan.
Agentlik ma’lumotlariga ko‘ra, Xushdil Qurbonov o‘z qarindoshi Jo‘raxon Xolov bilan fuqaro Mahmadrizo Rajabov ishonchiga kirgan va unga 0,30 gektar yer ajratishni va’da qilib, evaziga 50 ming dollar talab qilgan.
Pulni qo‘lga kiritgach, javobgar shaxs Sabzali Majidovga murojaat qilganini aytgan. O‘zi esa bu paytda Majidovga qo‘ng‘iroq qilib, o‘zini prezidentning o‘g‘li Somoni Emomali deb tanishtirgan va Mahmadrizo Rajabovga yer ajratishni buyurgan. Biroq Majidov Xushdil Qurbonovga ishonmagan va hech kimga yer ajratmagan.
Ushbu holat bo‘yicha jinoiy ish qo‘zg‘atilib, tergov olib borilmoqda.
