Vetnamdagi fabrikalardan birining 28 yoshli ishchisi yarim yil davomida yiqqan puliga yaxshi ko'rgan qizi uchun Ayfon 6 sotib olmoqchi edi. Apple ning so'nggi modelini xarid qilish maqsadida u Singapurga keldi. Biroq do'kon xodimlari smartfon narxi ming dollarga qimmatlashganini aytishdi. Bu xabar xaridorga kutilmagan “zarba” bo'ldi.
Mirror nashrining yozishicha, vetnamlik Pan Van Tay ismli ishchining maoshi 200 dollardan oshmaydi. Sevgilisi uchun atayin smartfon olishga boshqa shaharga kelganda esa Mobile Air do'konidan noxush xabar eshitdi.
Sotuvchilar ushbu xaridorga smartfon uchun do'kon saytida e'lon qilingan 730 dollar narxdan tashqari, yana ming dollarni “kafolat xati”ga to'lashi kerakligini aytishdi. Vetnamlik aldanganini tushunib etgach, tizzasi bilan cho'kkalagan holda sotuvchilardan e'lon qilingan narx bo'yicha puli to'langan ayfonni berishlarini so'rab, yalina boshladi. Lekin ular bechora xaridor ustidan kuldilar xolos.
Chaqiruv bo'yicha kelgan politsiya ham xaridorga yordam berolmadi. Natijada, do'kon xodimlari vetnamlikka faqat 250 dollarni qaytib berishga rozi bo'lishdi. Biroq vetnamlik oshiqning hikoyasi hali yakuniga etmadi. Uning baxtiga sotuvchilardan smartfonni yolvorib so'ragan holati rolik sifatida yozib olinib, Internet tarmog'ida tez tarqab ketdi. Buni ko'rgan rahmdil singapurliklar yangi Iphone 6 uchun etadigan mablag' yig'ishni tashkillashtirishdi.
Tashkillashtiruvchilardan birining aytishicha, hozirda 12 ming dollarga yaqin mablag' yig'ilgan, bu nafaqat yangi telefonga, balki Singapurda yashash uchun ham etadi. “Biz xorijlikka o'z mehmondorchiligimizni namoyish etmoqchimiz va firibgarlar, o'g'rilar milllati emasmizligimizni isbotlamoqchimiz”, - deydi u.
Aniqlanishicha, Mobile Air do'koni shu kabi firibgarliklarga avval ham yo'l qo'ygan. Ayni vaqtda uning egasi qochqinlikda ekanligi xabar qilinmoqda.
