TripAdvisor turistik portali dunyoning eng mashhur muzeylarining an’anaviy Travelers’ Choice Awards reytingini e’lon qildi. Bu haqda Korrespondent.net xabar bermoqda. Bunga asoslanib "Daryo" xabar berdi. Forbes.ua’ning qayd etishicha, ro‘yxat kutilmagan ko‘rinishga ega: mashhur Luvr muzeyi hatto kuchli o‘nlikka ham kirmay,
19-pog‘onani band etgan. Chikagodagi unchalik taniqli bo‘lmagan San’at instituti esa birinchi o‘rinni egallagan.
Luvr muzeyi. Foto: impressivemagazine.com
Ma’lum qilinishicha, reyting muzeyga tashrif buyurganlar fikrlari va baholariga qarab tuzilgan. Xususan, Luvrning bunday past pog‘onadan joy olishiga turistlarning katta miqdori, nihoyatda uzun navbatlar, ba’zan sifati past audiogidlardan foydalanilishi sabab bo‘lgan. Bundan tashqari, ko‘plab san’at mahsulotlariga izoh faqat fransuz tilida berilgani ham qator tashrifchilarga ma’qul kelmagan.
San’at instituti (Chikago)
San’at instituti. Foto: AP
Chikago San’at instituti shahardagi eng mashhur joylardan biri hisoblanadi. Muzeyga har yili ikki milliondan ziyod kishi tashrif buyuradi.
San’at instituti. Foto: AP
San’at institutining kolleksiyasi 300 mingdan ziyod eksponatdan iborat.
San’at instituti. Foto: AP
Muassasaning impressionizm, postimpressionizm va Amerika rassomchiligiga bag‘ishlangan zallari boshqa bo‘limlarga nisbatan ko‘proq e’tiborni tortadi.
Milliy antropologiya muzeyi (Meksika)
Milliy antropoliya muzeyi. Foto: AP
Tashrifchilar soni bo‘yicha Lotin Amerikasida birinchilikni egallagan Milliy antropologiya muzeyiga har yili ikki milliondan ziyod kishi keladi.
Milliy antropoliya muzeyi eksponati. Foto: AP
Muzey Meksikaning Kolumb davriga qadar bo‘lgan arxeologik va antropologik artefaktlari bilan shuhrat qozongan.
Milliy antropoliya muzeyi eksponati. Foto: AP
Uning eng asosiy eksponati diametri 400 santimetr va qalinligi deyarli 100 santimetrga teng mashhur Quyosh toshi (Quyosh taqvimi) hisoblanadi.
Ermitaj va Qishki saroy
Ermitaj va Qishki saroy. Foto: AP
Eng qadimgi muzeylardan biri bo‘lgan Sankt-Peterburgdagi Ermitajga har yili uch milliongacha kishi tashrif buyuradi. Ayni damda muzey kolleksiyasi uch millionga yaqin eksponatni tashkil etib, turli binolarda saqlanadi. Qishki saroy muzey binolari ichidagi eng chiroyli va asosiy muassasadir.
Ermitaj va Qishki saroy. Foto: AP
Ermitaj o‘z faoliyatini 1764-yil boshlaganiga qaramay, 1852-yilgacha muzeyga faqat sanoqli kishilargina kira olgan.
Pol Getti muzeyi (AQSh)
Los-Anjelesda joylashgan Pol Getti muzeyi xayriya va san’at bilan shug‘ullanuvchi ulkan Getti Markazi (The Getty Center)ning bir qismi hisoblanadi. O‘rta asrlar davridan hozirgacha bo‘lgan, asosan, Yevropa san’ati asarlarini tomosha qilish uchun mazkur muzeyga har yili 1,7 million kishi tashrif buyuradi.
Los-Anjelesdagi Pol Getti muzeyi. Foto: AP
O‘zining nihoyatda boy kolleksiyasidan tashqari, Getti muzeyi san’at bo‘yicha ma’ruzalar, bolalar va kattalar uchun rassomlik maktablari, mashhur rassom va haykaltaroshlar bilan uchrashuvlar, san’at haqidagi filmlar namoyishi singari qator madaniy tadbirlar bilan ham shuhrat qozongan.
Los-Anjelesdagi Pol Getti muzeyi eksponati: Jekson Pollok, “Freska” (1943). Foto: AP
Muzey asoschisi — amerikalik Pol Getti o‘limidan so‘ng, muzeyga 661 million dollar meros qoldirgani bois muzeyga kirish bepuldir.
Florensiya akademiyasi galereyasi (Italiya)
Italiyaning asosiy muzeyi Florensiya akademiyasi galereyasi, eng avvalo, Mikelanjelo yaratgan David haykali bilan mashhurdir.
Florensiya akademiyasi galereyasi eksponati. Foto: AP
Bundan tashqari, muassasada Mikelanjelo mualliflik qilgan boshqa san’at mahsulotlari, XV-XVI asrlarda yashab o‘tgan florensiyalik Sandro Bottichelli, Paolo Uchchello, Domeniko Girlandayo kabilarning asarlari ham mavjud.
Florensiya akademiyasi galereyasi. Foto: AP
Muzeyga kirish bolalar uchun bepuldir. 18 yoshdan kattalar uchun esa har oyning birinchi yakshanbasida muzey eksponatlarini bepul tomosha qilish imkoniyati yaratilgan.
