Italiyaning tort dizaynerlari milliy uyushmasining novvoy va rassomlari Shou Xobbi tadbiri doirasida dunyodagi eng katta tortni pishirdi. Bu haqda The Local xabar beradi.
Italiya xaritasi shaklida tayyorlangan shirinlikning yuzasi 244 kvadrat metr, og‘irligi esa bir tonnadan ortiqdir. Uni bezab turgan, shakardan yasalgan shakllar orasida Piza minorasi va Alp tog‘larini ko‘rish mumkin.
Dizayner va novvoylar pishiriqni Ginnesning Rekordlar kitobiga namoyish etish uchun to‘rt kun davomida mehnat qildi. Guinness World Records sudyasi Lorenso Veltri shirinlikni dunyodagi eng katta tort ekanligini rasman tasdiqladi. Shundan so‘ng tort 12 ming bo‘lakka bo‘linib, yarmarkaga tashrif buyurganlarga tarqatildi.
