16.03.2016, 11:00 Dunyo yangiliklari

Afg‘oniston shimolidagi Qunduz viloyati ma’muriyati mintaqada IShID guruhi jangarilari paydo bo‘lganidan tashvishda, deb xabar bermoqda “Interfaks”.

Qunduz viloyati politsiya boshqarmasi boshlig‘i, general Muhammad Qosim Jangal Bog‘ Tolo telekanaliga bergan intervyusida IShID jangarilari Chahordara tumani hududida uch haftadan buyon faoliyat yuritayotganini aytdi. Razvedka ma’lumotlariga ko‘ra, bu hududda ekstremistlar yoshlarni o‘z tarafiga og‘dirish bilan shug‘ullanmoqda.

Bundan tashqari, Bog‘ning guvohlik berishicha, IShID vakillari “Tolibon” jangarilari orasida ham tashviqot ishlarini olib bormoqda. Ularning soni hozirda 100—120 kishi atrofida.

IShID a’zolari tunlari qora bayroq ko‘targancha ko‘chalarda aylanib yurishini mahalliy aholi vakillari ham e’tirof etmoqda.

Shu bilan birga, viloyat kengashining fikricha, Chahordarada Markaziy Osiyo respublikalari vakillaridan tuzilgan “Jundulloh” singari ekstremistik guruhlar tarafdorlari IShID bayrog‘i ostida chiqmoqda.

Hozirga qadar IShID jangarilari Afg‘oniston janubidagi Zobul va Nangarxar viloyatlarida faol edi. Shimolda jangarilarning paydo bo‘lishi haqida rasmiy hokimiyat vakillari o‘tgan haftada gapira boshladi. Jumladan, Balx gubernatori Ato Muhammad Nur viloyat hududida IShID faollashganini tasdiqladi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.

Manba

Bo'lim: Dunyo yangiliklari Fikrlar: 0

Afg‘oniston rasmiylari mamlakat shimolida IShID jangarilari paydo bo‘lganini tasdiqladi

Qaynoq xabarlar

Qiziqarli ma'lumotlar