The Wall Street Journal gazetasi yozishicha, yangi avlod iPhone’larining xaridorgirligi Apple’ga smartfonlar sotish bo'yicha Samsung korporatsiyasiga yetib olishga imkon beradi.
Gazetada aytilishicha, 2011 yilning uchinchi choragida Samsung smartfonlar sotish ko'rsatkichlari bo'yicha Apple’dan o'zib ketib, bu sohada dunyoda birinchi raqamli korporatsiyaga aylangan. Shundan buyon Janubiy Koreyaning gigant korporatsiyasi birinchilikni hech kimga bermagan.
Ammo ayni paytda ayrim modellarning kutilganidek xaridorgir bo'la olmagani, smartfon ishlab chiqaruvchi boshqa kompaniyalar bosimining ortib borayotgani tufayli Samsung’ning reytinglari tushib bormoqda. Ma'lumotlarga qaraganda, o'tgan yilning uchinchi choragida kompaniya bozorga 78 mln smartfon yetkazib bergan. Bu yo'nalishda kompaniyaning global bozordagi ulushi 25 foizni tashkil qildi.
Apple ishlab chiqargan yangi iPhone 6 va iPhone 6 Plus modellariga esa talab katta bo'lib, o'tgan yilning oxirgi choragida kompaniya 66.5 mln smartfon sotishga muvaffaq bo'lgan.
