Shanxayda bo'lib o'tgan iste'molchilik elektronikasi ko'rgazmasida Audi kompaniyasi avtonom boshqarish tizimiga ega eng tez avtomobil kontseptini taqdim qildi. Yangi avtomobil R8 e-tron elektr kupesi negizida qurilgan. Avtopilot lazerli skanerlar, videokameralar va ultratovushli datchikilardan ma'lumot oladi.
Nemis avtomobilsozlari avtonom boshqarish tizimidan tashqari, Combined Charging System (CCS) deb nom olgan yangi quvvatlash qurilmasini namoyish qilishdi. Bu qurilma tufayli elektrokarning to'liq quvvatlanish vaqti 2 soatga qisqardi, akkumulyatorni to'ldirish uchun ham doimiy, ham o'zgaruvchan tokdan foydalanish mumkin. Avtomobilning qayta quvvatlanishsiz yurish zaxirasi 450 km.ni tashkil qiladi.
Yangi avtopilot ilk bor yanvarda Las-Vegasda o'tgan Consumer Electronics Show ko'rgazmasida namoyish etilgan. “Agar sizda yaxshi avtopilot bo'lsa, unda u tirik haydovchidan afzalroqdir. Avtopilot telefonda gaplashmaydi, yo'lovchi yoki yo'l chetida turgan biror qizga chalg'imaydi. Mening fikrimcha, bizning avtonom avtomobillarimiz, ko'pchilik haydovchilardan afzalroqdir”, deb aytdi taqdimot paytida Audi'ning texnologiyalar va kommunikatsiyalar bo'limi boshlig'i Stefan Mozer.
Avtonom boshqarish tizimi seriyali tarzda chiqariladigan Audi avtomobillarida 2017 yilda paydo bo'ladi. Avvalroq avtopilot bilan jihozlangan A8 ning yangi avlodi haydovchining ishtirokisiz soatiga 60 km.dan ko'p bo'lmagan tezlikda yura olishi ma'lum qilingandi. Undagi elektronika harakatlanish polosasini o'zgartira oladi, tormoz beradi, burilish chiroqlarini yoqa oladi va mashinani qo'yish uchun joy qidira oladi.
