Lamborghini kompaniyasi rahbari Stefan Vinkelmann 14 yillik faoliyatdan keyin italyan avtokontsernini tark etishi mumkin. Bu haqda Car nashri xabar qilgan.
Taxmin qilinishicha, Vinkelmann Volkswagen tizimida Audi uchun detallar tayyorlovchi Quattro GmbH kompaniyasi rahbarligi lavozimini egallashi mumkin. U nafaqaga chiqayotgan Xaynts Xollervegerning o'rnini egallashi aytilgan.
Lamborghini kompaniyasining yangi rahbari Stefano Domenikali bo'lishi mumkin. Ayni vaqtda u Audi kompaniyasida ishlamoqda.
Ma'lumot uchun, Stefan Vinkelmann 1964 yilda Berlin shahrida tug'ilgan. U avtomobilsozlik sanoatida 1994 yildan buyon ishlab kelmoqda. Vinkelmann turli yillarda Fiat va Mercedes-Benz kompaniyalarida faoliyat ko'rsatgan. 2005 yilning 1 yanvarida esa Lamborghini rahbariga aylangandi.
