Audi kompaniyasi Part-Time Scientists muhandislar guruhi bilan birga Audi lunar quattro nomini olgan lunoxod ishlab chiqdi. Motor.ru’ning xabar berishicha, qurilma 2017-yilda Yerning tabiiy yo‘ldoshiga uchirilishi rejalashtirilgan.
Amalda to‘liq alyuminiydan tashkil topgan konstruksiya muntazam to‘liq uzatma, to‘rt elektromotor, litiy-ionli akkumlyatorlar bloki, batareyalarni quvvatlantirish uchun zarur bo‘lgan harakatlanuvchi quyosh paneli va ikkita stereoskopik kamera bilan ta’minlangan.
Bundan tashqari, rover ilmiy tasvirga olish uskunasi bilan ham ta’minlangan. Hisob-kitoblar bo‘yicha, lunoxod soatiga 3,6 kilometr tezlikda harakatlanadi. Qurilma Avstriya Alplarida va Atlantika okeanidagi Tenerife orolida Oyga yaqin sharoitlarda sinovdan o‘tkazilgan.
Lunoxod 2017-yili – inson oxirgi marta Oyga qadam qo‘yganidan keyin 45 yil o‘tib uchiriladi. 380 ming kilometr yo‘l bosgan qurilma 1972-yili “Appollon-17” ekipaji qo‘ngan joyga tushishga harakat qiladi. Rover Oy sathida besh kun davomida harakatda bo‘ladi.
Qurilma ishlab chiquvchilari Google’ning Lunar X Prize sovrini uchun kurashishni rejalashtirishmoqda. Sovringa egalik qilish niyatida bo‘lgan muhandislar Oyga yengil qo‘nib, uning sathida kamida 500 metr harakatlana oladigan va Yerga yuqori aniqlikdagi foto- va videomateriallarni jo‘natishi kerak. Sovrinning mukofot jamg‘armasi 30 million dollarga teng.
