Facebookdagi “Obshchestvenniy kontrol” (“Jamoatchilik nazorati”) guruhi a’zolari avtobuslar salonlarida haydovchilarning chekishi holatlarini faol muhokama qilgan edi, deb yozadi “Uz24.uz”.
Ularning qayd etishicha, bunday haydovchilar tez-tez uchrab turadi va ularning ko‘pchiligi tutundan dimiqqan yo‘lovchilarning chekishni to‘xtatish haqidagi iltimoslariga e’tibor ham qilmaydi.
“Toshshahartransxizmat”ning ekspluatatsiya bo‘limi mutaxassisi so‘zlariga ko‘ra, avtobusda chekish Vazirlar Mahkamasi qarori bilan taqiqlangan. Bundan tashqari, Ma’muriy javobgarlik to‘g‘risidagi kodeks ham jamoat transportida sigareta va spirtli ichimliklar iste’mol qilishni man etadi.
Ma’lum bo‘lishicha, kompaniyaga chekuvchi haydovchilar to‘g‘risidagi shikoyatlar ko‘p tushadi. Kompaniya vakili ular ushbu vaziyatdan xabardor ekanligi va ma’muriy choralar qo‘llagan holda bunday haydovchilarga ta’sir o‘tkazishga harakat qilayotganligini ta’kidladi.
