BMT Oliy komissarining muhojirlar bo‘yicha boshqarmasi, Xalqaro migratsiya tashkiloti va BMT Bolalar fondi (YuNISEF) tomonidan chop etilgan qo‘shma bayonotda 2015-yil sentabr oyidan buyon Yevropaga yo‘l olgan muhojirlarning kamida 340 nafar farzandi O‘rtayer dengizida g‘arq bo‘lganligi ma’lum qilingan. Bu haqda “TASS” xabar qilmoqda.
Mazkur tashkilotlar xalqaro hamjamiyatga mojaro va umidsizlikdan qochayotganlarning xavfsizligini oshirish maqsadida chora ko‘rishga chaqirdi.
“Davlatlar bu yo‘lni yanada xavfsizroq qilish uchun hamkorlik qila oladi va hamkorlik qilishi shart. (Yevropaga yetib olish uchun) xavfsizroq yo‘l bo‘la turib, hech bir kimsa o‘z farzandini qayiqqa o‘tqazmaydi”, ― dedi YuNISEF ijrochi direktori Entoni Leyk.
Bayon qilinishicha, Yevropaga Turkiya orqali yo‘l olgan qochoq va muhojirlarning 36 foizini bolalar tashkil qilmoqda.