Yamanda 2015-yil mart oyidan buyon davom etayotgan qurolli mojarolar tufayli 6 mingdan ziyod kishi, shu jumladan, 3 ming nafar tinch aholi vakili halok bo‘ldi . Bu haqda BMT bosh kotibining gumanitar ishlar bo‘yicha o‘rinbosari Stiven O’Brayen bergan ma’lumotlarga asosan “TASS” xabar qilmoqda.
O’Brayenning ta’kidlashicha, Saudiya Arabistoni yetakchiligidagi koalitsiya tomonidan qo‘llab-quvvatlanaytogan hukumat kuchlari va shia isyonchilari (xusiylar) o‘rtasida 11 oydan buyon davom etayotgan to‘qnashuvlar oqibatida 6 mingdan ziyod kishi qurbon bo‘lgan, 29 mingga yaqin odam yaralangan.
“BMT qurbon bo‘lganlardan kamida 2 997 kishi va yaralanganlardan 5 659 kishi tinch aholi vakili bo‘lganligini tasdiqladi”, ― dedi o‘rinbosar.
Eslatib o‘tamiz, fevral oyining boshida Yaman hukumati va prezident Abd Rabbo Mansur Hodiy tarafdori bo‘lgan kuchlar mamlakat shimolida, al-Jauf viloyatidagi strategik harbiy baza ustidan nazoratni tiklagan edi.