15 fevral, dushanba kunidan e`tiboran Toshkentda lisenziyasiz taksichilar faoliyatiga chek qo`yish maqsadida ichki ishlar boshqarmasi, yo`l harakati xavfsizligi boshqarmasi, Davlat soliq qo`mitasi va «Toshshahartransxizmat» xodimlaridan iborat 47 ta guruh ish boshlaydi. Bu haqda Toshkent shahar hokimligida bo`lib o`tgan matbuot anjumanida ma`lum qilindi, deya xabar beradi «Uz24».
Ma`lum bo`lishicha, lisenziyasiz yo`lovchi tashiganlik uchun jismoniy shaxslarga eng kam ish haqining 20 dan 100, yuridik shaxslar uchun esa 50 dan 100 barobarigacha jarima solinadi. Agar bu holat qayta takrorlansa, jinoiy javobgarlikka tortilish mumkin.
4 o`rinli lisenziyali taksi uchun davlat boji yiliga 75 dollar, 4 dan ortiq o`rinli taksi uchun esa yiliga 125 dollardan (davlat kursida) iborat. Lisenziya olish masalasida Toshkent shahar hokimligi yo`lovchi transportining barcha turlari harakatini lisenziyalash va muvofiqlashtirish departamentiga murojaat etish lozim.
Manba: "Darakchi" nashri
