Turkiya prezidenti Toyib Erdoʻgʻon rus xalqini oʻziga dushman deb bilmasligini taʼkidlagan holda, Rossiya va Turkiya oʻrtasidagi munosabatlar qayta tiklanishiga umid bildirdi. Bu haqda RIA Novosti xabariga koʻra "Sputnik News" ma'lumot bermoqda.
"Biz rus xalqiga dumshan emasmiz. Rossiyadan yiliga toʻrt million sayyohlarni qabul qiladigan mamlakat bunday deb oʻylashi, mumkin ham emas. Rossiya va Turkiya oʻrtasidagi savdo aylanmasi yiliga 35 millardga yetgan edi, biz bu raqamni 100 millardga yetkazishni xohlagan edik. Ikki nafar uchuvchini deb, Rossiya Turkiya kabi doʻstini yoʻqotgani, achinarli, albatta. Umid qilamanki, munosabatlarni yaxshilash uchun koʻrilayotgan choralar ijobiy samara beradi”, — dedi Erdoʻgʻon chorshanba kuni Anqarada mahalliy maʼmuriyat vakillari bilan uchrashuv davomida.
"Aytishadiki, agar biz Rossiyaga qarashli samolyotni urib tushirmaganimizda, hozirgi inqiroz holatiga kelib qolmas edik. Nimaga, agar Rossiya bizning havo chegaramizni buzmaganida, shu ahvolga tushmagan boʻlardik, deb gapirishmaydi?" — dedi prezident.
Erdoʻgʻon, shuningdek, Rossiya uchun Suriya — “olis oʻlkadagi manfaat” boʻlishi mumkin boʻlgan bir paytda, Turkiya uchun bu — “hayot-mamot” masalasi ekanligini taʼkidlab oʻtdi.
