O‘zbekistonda Janubiy Koreyaning LG kompaniyasiga tegishli LG Magna smartfoni sotila boshladi, deya xabar bermoqda “Mobinfo.uz”. U 2015-yil boshida Spirit va Leon modellari qatorida taqdim etilgan edi.
Lotin tilida “buyuk” degan ma’noni anglatuvchi LG Magna smartfoni to‘rt yadroli protsessor hamda 5 dyuymli HD IPS-displey bilan jihozlangan, u In-Cell Touch texnologiyasi tufayli siniq oyna bilan ham ishlayveradi. Ushbu texnologiyaning yana bir afzalligi shundaki, displey barmoq tegishiga tezkorlik bilan javob qiladi.
LG Magna 8 megapikselli asosiy va 5 megapikselli old kamera, 2450 mA/soat sig‘imli akkumulyatorga ega. U selfi ishqibozlari uchun maxsus yaratilgan bo‘lib, undagi “Qo‘l ishorasi bilan suratga olish” funksiyasini ishga tushirish uchun old kameraga kaftni ochib ko‘rsatish, so‘ng yana musht qilib qisish kifoya. Glance View funksiyasi yordamida esa displey bloklanib turgan holatda ham ekranda barmoqni pastga yurgizish orqali vaqt, so‘nggi xabarlar yoki javobsiz qolgan qo‘ng‘iroqlar kabi asosiy ma’lumotlarni ko‘rish mumkin.
Poytaxtdagi “Fleshka” savdo majmuasida LG Magna smartfonini taxminan 1 million so‘mga xarid qilish mumkin.
