Bugun, 6 mart kuni soat 18:00 da Alisher Navoiy nomli kinosaroyda rejissyor Jahongir Ahmedovning “Majnun” dramatik melodramasi taqdimot marosimi bo`lib o`tdi.
Marosimga tayyorgarlikni film ijodkorlari ancha oldin boshlab yuborgan edi. Xususan, Alisher Navoiy nomli kinosaroyga fimning 27 metrli bilbordi o`rnatilgani haqida xabar bergandik.
Bugungi taqdimot marosimi ham kutilmagan hodisalarga yangiliklarga boy tarzda o`tdi. Jumladan, premeraga tashrif buyurgan taniqli san`atkorlar kinozalga maxsus to`shalgan qizil yo`lakchadan o`tib borishdi. Ma`lum bo`lishicha, kinosaroydagi filmlar taqdimot marosimida anchadan beri bunday holat kuzatilmagan.
“Majnun” filmining ilk namoyishida ko`plab mashhur san`atkorlar tashrif buyurganiga guvoh bo`ldik. O`zbekiston xalq artisti Saida Rametova, aktyorlar Matyoqub Matchonov, Alisher Uzoqov, Asal Shodieva, Adiz Rajabov, Ra`no Shodieva, Muhammad Iso Abdulhairov, Ulug`bek Qodirov rejissyor Rustam Sa`diev va bu ro`yxatni uzoq davom ettirish mumkin.
Qizil yo`lakchada xonanda Shohruhxon va aktrisa Asal Shodievaning birgalikda paydo bo`lishi katta shov-shuvga sabab bo`ldi. Tasodifanmi yoki boshqa sabablar bilan birgalikda qizil yo`lakchaga kirib kelgan bu ikki san`atkor majburlikdan ilk “Majnun” panosi oldida suratga tushishdi. Qizil yo`lakcha bo`ylab, birin ketin kirib kelishni boshlagan aktyor va aktrisani to`xtatib, suratga tushish so`ralganida, Asal suratga tushish uchun to`xtagan bir paytda Shohruhxon namoyishkorona tarzda suratga tushishdan bosh tortdi va aktrisaning orqa tomonidan tezgina yurib o`tib ketdi. Bu holat yig`ilganlarni ajablantirdi.
Manba: "Darakchi" nashri