Pokiston o‘z qo‘lidagi yadroviy qurol zaxirasini kamaytirish masalasini ko‘rib chiqishga tayyor, ammo buning uchun Hindiston ham shu yo‘lni tutishi talab etiladi. Bu haqda mamlakat bosh vazirining tashqi siyosat bo‘yicha maslahatchisi Sartoj Aziz bayonot berdi, deb xabar qiladi “TASS”.
1-mart, seshanba kuni u, agarda Hindiston yadroviy qurolni kamaytirish yo‘lidan borsa, Pokiston ham buning ustida o‘ylab ko‘rishini aytdi.
“Agarda Hindiston bunday qilmasa, Pokiston o‘z yadroviy snaryadlari sonini qanday qilib qisqartirishi mumkin?”, — savol berdi siyosatchi.
Azizning ta’kidlashicha, Pokiston xafsizligiga tahdid soluvchi birinchi omil Hindiston bo‘lsa, ikkinchisi terrorchilikdir.
“Xavfsizlik borasidagi xavotirimiz Hindiston bilan strategik sohada va oddiy qurolli kuchlar bo‘yicha tenglikning yo‘qligidandir. Notenglik Pokiston foydasiga oshmayapti”, — deb tan oldi hukumat vakili.
“Bizning yadroviy dasturimiz tutib turish omilidir, — so‘zida davom etdi Aziz. — Bizga nisbatan Hindiston yadroviy arsenalini tezroq o‘stirib bormoqda. Tutib turish konsepsiyasi esa tabiatiga ko‘ra harakatchandir. U samarador bo‘lishi lozim. Bu konsepsiyaning diqqat markazida Hindiston turadi”.
