NowSecure kompaniyasi tadqiqotchilari Samsung smartfonlari dasturlarining himoyalanmagan Wi-Fi aloqa orqali smartfon egasining ma'lumotlariga kirsa bo'ladigan zaif tomonini aniqlashdi. Bu haqda CNN Money sayti xabar bermoqda.
Bu muammo 2012 yilda ishlab chiqarilgan Galaxy S3 dan boshlab, Android operasion tizimida ishlovchi Samsung`ning barcha smartfonlariga taalluqlidir. Hammasi bo'lib bunday qurilmalardan 600 mln dona mavjud. Zaif tomon klaviatura ishiga javob beruvchi dasturda aniqlangan va undan standart klaviaturani o'chirib qo'yib qutulishning iloji yo'q. Ekspertlar bu xavfning jiddiyligini 10 balldan 8,3 ballga baholashmoqda.
NowSecure`ning aytishicha, biroq bu zaiflikka kirish oson ish emas: undan foydalanish uchun qurilmaga klaviatura dasturi yangilanayotgan lahzada ulanish kerak.
Tadqiqotchilar bu muammoni 7 oy avval aniqlashgan va zudlik bilan bu haqda Samsung ga xabar berishgan. Biroq o'shandan beri muammoni bartaraf etish uchun Samsung tomonidan hech qanday chora ko'rilmaganligi tufayli NowSecure bu muammoni oshkor qilishga qaror qildi.
