Toshkentning “Lokomotiv” futbol klubi mavsumlar oralig‘ida jamoaga kelib qo‘shilgan futbolchilarni jamoatchilikka tanishtirish marosimini o‘tkazdi. Bu haqda klub matbuot xizmatiga tayanib, O‘zbekiston futbol federatsiyasi matbuot xizmati xabar berdi.
O‘zbekiston professional futbol ligasining o‘tgan mavsumida kumush medallarini qo‘lga kiritgan toshkentliklar tarkibida yangi mavsumdan boshlab Server Jeparov, Kaxi Maxaradze, Sadriddin Abdullayev va Sherzod Fayziyev harakat qiladigan bo‘ldi.
Ikki karra Osiyoning eng yaxshi futbolchisi deb topilgan O‘zbekiston milliy terma jamoasi a’zosi Server Jeparov tadbir davomida Janubiy Koreyaning “Ulsan Xyunday” klubi bilan shartnomasi tugagach, “temiryo‘lchilar” taklifini qabul qilganini aytib o‘tdi. Ta’kidlash kerakki, “Lokomotiv” 33 yoshli tajribali futbolchi uchun professional futbolchilik faoliyatidagi sakkizinchi klub bo‘ladi. Bunga qadar Jeparov “Navbahor”, “Paxtakor”, “Bunyodkor”, “Seul” (Janubiy Koreya), “Ash-Shabob” (Saudiya Arabistoni), “Seongnam” (Janubiy Koreya) hamda “Ulsan” (Janubiy Koreya) jamoalarida faoliyat olib borishga ulgurgan.
O‘zbekiston milliy terma jamoasi safida 113 o‘yinda maydonga tushib, 25 golga mualliflik qilgan Server Jeparov “Lokomotiv” tarkibida 8-raqamda to‘p tepadigan bo‘ldi. Jamoa safiga kelib qo‘shilgan boshqa futbolchilar – Fayziyevga 37, Abdullayevga 7 va Maxaradzega 5-raqamli futbolkalar taqdim etildi.
Shuni qo‘shimcha qilish kerakki, “Lokomotiv” mavsumdagi ilk rasmiy o‘yinini Osiyo Chempionlar Ligasi—2016 guruh bosqichi doirasida Saudiya Arabistonining “Al-Ittihod” jamoasiga qarshi o‘tkazadi. Ushbu o‘yin 23-fevral, seshanba kuni, “Lokomotiv” stadionida, soat 15:00 da boshlanadi.
