Germaniya kansleri Angela Merkel Instagram ijtimoiy tarmog‘ida sahifa ochdi va unga taniqli siyosiy arboblar, xususan, Rossiya prezidenti Vladimir Putin va Ukraina davlat rahbari Pyotr Poroshenko bilan birga tushgan suratlarini joylashtirdi. Bu haqda “RIA Novosti” xabar bermoqda.
Kanslerning haqiqiyligi tasdiqlangan sahifasiga hozirgi qadar 30 mingdan ortiq foydalanuvchi obuna bo‘ldi. Sahifa ochilganining birinchi kunidayoq unga turli tadbirlardan olingan 40dan ortiq surat joylashtirildi.
Sahifaga yuklangan suratlarda Turkiyaning Suriya bilan chegarasi yaqinidagi shaharchada harbiy xizmatchilar bilan muloqot qilayotgan kanslerni, Merkelning Rim papasi Fransisk bilan olib borayotgan suhbati tasvirlangan lavhalarni va boshqa suratlarni ko‘rish mumkin.
Instagram – fotosuratlar va qisqa videoroliklarni internetga joylashtirishga ixtisoslashgan servisdir. Instagram foydalanuvchilari soni jahon bo‘ylab 200 million kishidan oshib ketgan. Har kuni ular tomonidan servisga 60 million surat yuklanadi va 1,6 milliard “layk” qoldiriladi.
