Ebola virusini yuqtirib olgan yagona Britaniya fuqarosi bo‘lgan shotlandiyalik hamshira Polin Kafferki xastalikka chalinganidan buyon uchinchi marta shifoxonaga yotqizildi. Bu haqda, mamlakat Milliy sog‘liqni saqlash tizimi xabariga asoslanib, “TASS” axborot berdi.
Kafferkining Ebolaga yo‘liqqani 2014-yilning 29-dekabr kuni ma’lum bo‘ldi. Syerra-Leoneda bo‘lib qaytgan ayol u yerda Birlashgan Qirollikning boshqa tibbiyot xodimlari bilan birga Ebola epidemiyasiga qarshi kurashda ishtirok etgan edi.
2015-yilning 3-yanvar kuni uning ahvoli yomonlashdi. Kafferkining tomirlariga kasallikni yenggan xastalarning qoni quyildi. Shuningdek, u nomi oshkor etilmagan sinov dori vositasi yordamida davolandi.
Ammo 2015-yilning 9-oktabr kuni hamshira yana shifoxonaga yotqizildi. 14-oktabrda uning ahvoli o‘ta og‘irligi e’lon qilindi, shunga qaramay, 12-noyabrda ayol sog‘lomlashgani munosabati bilan Londondagi gospitaldan yana chiqarildi.
2015-yil avgust oyi oxiridagi ma’lumotlarga ko‘ra, jahon bo‘ylab Ebola virusi yuqishi bilan bog‘liq 28041 holat qayd etilgan, 11302 kishi halok bo‘lgan.
Qurbonlar va kasallanish holatlarining asosiy qismi Gvineya, Liberiya va Syerra-Leone kabi G‘arbiy Afrika mamlakatlariga to‘g‘ri keladi.
