NASA astronavti Stiv Suonson Xalqaro kosmik stansiyaga “Manchester Yunayted” klubi bayrog‘ini olib chiqdi. Bayroqni kosmonavtga ingliz klubining rossiyalik ishqibozi Aleksey Yakovlev bergan, deb xabar qiladi Mirror.
Amerikalik Stiv Suonson XKSga bannerni olib chiqqach, uning bir necha suratlarini oldi. Moskva yaqinida yashovchi Yakovlev bayroqning fazoviy ekspeditsiyaga yo‘l olgan “Soyuz TMA-12M” kemasida ekanligini tasdiqlovchi maxsus sertifikat oldi.
“Qilgan ishimdan faxrlanaman, chunki ‘MYu’ men uchun ko‘p narsani anglatadi. Bizning bayroq kosmosda hilpiramoqda, hech kim undan ham balandroqqa chiqa olmaydi”, — dedi Yakovlev. U bu ishi bilan klubga fazoviy energiya bermoqchi bo‘lganini qo‘shimcha qildi.
Bundan tashqari, Yakovlev 21-oktabr kuni Yevropa Chempionlar Ligasi doirasida SSKA va “Manchester Yunayted” jamoalari o‘rtasida bo‘lib o‘tadigan uchrashuvdan oldin bayroqni ingliz klubi vakillariga topshirmoqchi ekanligini ma’lum qildi.
