Nyu-York birjasidagi savdolar chog'ida Facebook kompaniyasi aktsiyalari ilk marta 100 dollardan qimmatga sotildi.
Bloomberg nashri xabariga ko'ra, bu ijtimoiy tarmoq aktsiyasi narxi 2015 yilning iyulida ham 100 dollarga ko'tarilgan, lekin bu narx saqlanib turmagandi. 23 oktyabr kungi savdolar vaqtida kompaniya aktsiyalari bahosi 2,2 foizlik o'sishni qayd etib, 101,88 dollardan sotildi.
Shu tariqa, 2012 yilda ilk marta birjaga kirgan kompaniya aktsiyalari narxi o'tgan vaqt ichida 475 foizlik o'sishga erishdi. Standard & Poor's 500 reytingida bu ko'rsatkich to'rtinchi yaxshi natija sifatida qayd etilgan.
Shuningdek, Facebook kapitallashuv bo'yicha ham boshqa hech qaysi kompaniya qayd etmagan natijani ko'rsatgan - 250 mlrd dollar.
Ma'lumot uchun, Facebook, Apple, Microsoft, Amazon va Google kompaniyalarining umumiy kapitali Standard & Poor's 500 reytingiga kiruvchi barcha kompaniyalarning kapitalida deyarli 10 foizlik ulushga ega.
