Dunyodagi eng yirik ijtimoiy tarmoqlardan hisoblangan Facebook asoschisi va bosh direktori Mark Sukerberg va uning ayoli Prissilla Chan San-Fransiskodagi shifoxonalardan biriga 75 million dollar miqdoridagi xayriya mablag'i ajratdi.
“Ushbu pullar biz uchun katta ahamiyatga ega. Ular shifoxonaning yangi reanimatsiya bo'limi va travmatologik markazi qurilishi uchun sarflanadi”, – deyiladi shifoxona ma'muriyati xabarida.
Sukerbergning mazkur xayriyasi shifoxona tarixidagi eng katta xayriya mablag'i hisoblanadi. Facebook asoschisining ta'kidlashicha, ular tomonidan ajratilgan xayriya mablag'i San-Fransiskoning barcha aholisi uchun tibbiy xizmat ko'rsatilishiga imkon yaratadi.
“Bizning fikrimizcha, har bir odam sifatli tibbiy xizmatdan foydalanish imkoniyatiga ega bo'lishi lozim. San-Fransisko – bizning uyimiz, biz bu yerda ishlaymiz va yashaymiz hamda odamlarga foyda keltirishni xohlaymiz”, – deydi Sukerberg.
Ma'lumot uchun, Forbes jurnali aniqlashicha, 30 yoshli Sukerberg eng saxovatli amerikalik milliarderlar reytingining 4-pog'onasida bormoqda. O'tgan yili u G'arbiy Afrikada Ebola virusi tarqalishiga qarshi kurash uchun 25 mln dollar miqdorida xayriya qilgan edi.
